बाँकेका अधिकांश पर्यटकीयस्थल वनभोजले भरिभराउ

Published: November 12, 2018 | 6:01 am | सोमवार, कार्तिक २६, २०७५ | ३११३ पटक पढिएको

नेपालीका प्रमुख चाडपर्व दशैँ तिहार सकिनाका साथै जाडो याम पनि शुरु भइसकेको छ।

तिहारमा देउसी–भैलो खेलेर मनोरञ्जनसँगै आर्थिक सङ्कलन गर्नेमध्ये कसैले सामाजिक काममा ती रकम सदुपयोग गर्दै आएका छन् भने कसैले वनभोजमा खर्च गरिरहेका पाइन्छ।

तिहार सकिएलगत्तै यहाँ वनभोजमा आउने लहर शुरु भएको छ। जिल्लाका विभिन्न पर्यटकीयस्थलमा दैनिकजसो सयौँ युवायुवती वनभोजका लागि आउने गर्छन्। हिजोआज यहाँ वनभोजमा आउनेको घुइँचो लागेको छ। अधिकांश पर्यटकीय क्षेत्र बाँके राष्ट्रिय निकुञ्जसँग जोडिएका छन्।

निकुञ्जमा चराचुरुङ्गी देखिनाका साथै वातावरणीय सुन्दरताका कारण पनि ती स्थान पर्यटकका लागि महत्वपूर्ण स्थलको रुपमा विकसित हुँदै आएका हुन्। हरेक समूहले आआफ्नै तरिकाले बाजागाजा तथा वेषभूषामा सजिएर वनभोज मनाइरहेका देखिन्छन्। वनभोजमा आएकाको रौनक नै बेग्लै देखिन्छ।

साथीहरु जम्मा भएर तिहारमा देउसी–भैलो खेल्ने र वनभोज खाएर रमाइलो गर्ने यहाँको प्रचलन नै भैसकेको छ। बर्दिया बाँसगढी नगरपालिकाका भूपेन्द्र खड्का बाँकेको अगैयास्थित राप्ती नदी किनारमा रहेको पार्कमा रमाउँदै देउसी–भैलो खेलेर सङ्लित रकमले साथीसँग रमाइलो गरिरहेको बताउछन्।

‘देउसी–भैलोबाट उठेको रकम वनभोजमा खर्च गर्न हामी यहाँ आएका हौँ’, खड्का भन्छन्, ‘चाडपर्वमै साथीसङ्गी एकापसमा भेट भएर रमाइलो गर्छौं। अन्य समयमा त भेटघाट नै हुँदैन, चाडपर्व पारेरै रमाइलो गर्ने त हो नि?’ यहाँका प्राय सबै पर्यटकीयस्थल वनभोजमा आएका समूहले भरिभराउ भएका छन्।

गाभर भ्यालीमा वनभोजमा आएका सुर्खेत वीरेन्द्रनगर नगरपालिका–१३ का रमेश आचार्य पनि चाडपर्व सकिएसँगै देउसी–भैलोबाट सङ्कलन भएको रकमले साथी रमाइलो गर्दै वनभोज गर्न आएको बताउछन्। आफूहरूमा देउसी–भैलो खेलेपछि वनभोज गर्ने परम्परानै भएको उनको भनाइ छ।

आचार्य भन्छन्, ‘हामी रमाइलो मात्रै गर्दैनौँ, साथीभाइसँग एकै ठाउँमा भेला भएर भविष्यका योजना बुन्नाका साथै नयाँ र पुराना पुस्ताबीच घुलमिल पनि गराउँछौँ।’ वनभोजलाई साथीको बिदाइ, विभिन्न सङ्घसंस्थाका साधारणसभा, पारिवारिक भेटघाटजस्ता अवसरका रुपमा पनि लिइन्छ।

यहाँको गाभर भ्याली र अगैया मात्र नभई ढकेरी, मानखोला, चट्टारलगायत पर्यटकीयस्थल वनभोज टोलीले भरिभराउ छन्। वनभोजका लागि बाँकेसँगै बर्दिया, दाङ र सुर्खेतबाट पनि छुटृाछुटृै टोली आउने गरेको गाभर भ्याली सामुदायिक होमस्टे व्यवस्थापन समितिका अध्यक्ष कृष्णलाल चौधरी बताउनुहुन्छ ।

वनभोज खान जानेको चहलपहल बढेसँगै बाँके राष्ट्रिय निकुञ्ज घुम्ने आन्तरिक पर्यटकको सङ्ख्यामा समेत वृद्धि भएको छ । निकुञ्जलगायत अन्य पर्यटकीय क्षेत्रमा दृश्यावलोकनका साथै घुमघाम गर्नेको सङ्ख्या वृद्धि भएको जानकारी दिँदै चौधरीले भन्छन्, ‘शनिबारका दिन धेरै भीड हुने गरेको छ।’

शनिबार सार्वजनिक बिदा हुने भएकाले विद्यार्थी तथा कर्मचारी परिवारका साथ घुम्नका लागि पनि ती स्थान पुग्ने गर्छन्। ढकेरीमा मात्र दैनिक आठदेखि १५ वटासम्म टोली पुग्ने गरेका छन्। गाभरमा पनि वनभोज टोलीको उस्तै भीडभाड हुने गरेको छ। ‘कात्तिकदेखि वनभोज शुरु भइ यो क्रम वैशाख महिनासम्म चल्छ।’

३११४ Total Views ६ Views Today

Comments